من حوالي 21 سنة وتحديداً في يناير 2001 الرئيس الفرنسي جاك شيراك سافر للعاصمة الكاميرونية ياوندي علشان يحضر القمة الفرنسية الأفريقية المهم وهو هناك الأسقفية الفرنسية في فرنسا كانت متضايقة من الزيارة بتاعته فطلعت بيان تهزأه فيه بالأدب وقالت فيه يا جماعة المفروض إن الرئيس الفرنسي ينأى بنفسه عن الأنظمة الأفريقية وما يتعاملش معاها لأن دول ناس بيعملوا حاجات لا تتوافق مع قيم الجمهورية الفرنسية العريقة "جاك شيراك" أول ما قرأ البيان دا اتعصب وبعد ساعات من صدور البيان الصحفيين الموجودين في مقر انعقاد القمة في الكاميرون تفاجؤوا بإن الرئيس الفرنسي خارج لهم قرب نص الليل وهو ماسك في إيده قزازة بيرة علشان يتكلم معاهم ويعلق بشكل غير مباشر على بيان الأسقفية شيراك قال نصاً للصحفيين "إحنا قعدنا نستنزف أفريقيا" لمدة أربع قرون ونص. . الناس دي إحنا نهبنا المواد الخام بتاعتهم ودمرنا ثقافتهم ودالوقت بنسرق أفضل عقولهم من خلال المنح الدراسية اللي بنديها لهم وفي الآخر قلنا الأفارقة دول ما ينفعوش في حاجة وأفريقيا دي منطقة تعيسة ما فيهاش نخب أو عقول محترمة وبعدما اغتنينا على حسابهم "جينا نديهم دروس" طبعاً التصريحات دي كانت مفاجأة لكل اللي سمعها ودا مش لأن اللي اتقال دا جديد لا المفاجأة كانت في هوية اللي قال الكلام دا رئيس فرنسا مش عارف تعرفه واللا لا بس أفريقيا هي القارة الأغنى في العالم بالموارد الطبيعية ولكنها في نفس الوقت أفقر قارة من حيث مستويات المعيشة واحد من أهم أسباب فقر وجزء كبير من القارة تعيسة الحظ دي هما الفرنسيين فرنسا لحد النهار دا مسيطرة على اقتصادات 15 دولة أفريقية الـ 15 دولة دول على الورق دول مستقلة لكن في الواقع أمرها مش في إيدها وبيتم استنزافها اقتصادياً من قبل فرنسا مليارات الدولارات بتتحول بصفة دورية من الدول دي للخزانة الفرنسية بمنتهى الشياكة قانوناً نص الفلوس اللي بتدخل الدول دي لازم تتبعت فرنسا الفرنسيين بيسرقوا الأفارقة وبيسيطروا على اقتصادهم بطرق جهنمية أتحدى إن أي حد فيكم سمع عن حاجة شبهها قبل كدا ودا ببساطة لأن مفيش كدا دا "سيستم" غريب جداً واللي بيحاول من القادة الأفارقة إنه يخرج بلده برا "السيستم"دا آخرته وحشة فيه رؤساء ووزراء اتقتلوا بس علشان يبقى الوضع كما هو عليه بدون ما أطول عليكم خلينا نبدأ الحلقة ويا ريت تركزوا معايا لأن الحلقة دي فيها تفاصيل وأسماء كتير جداً ولكن قبل ما أبدأ حابب بس أفكركم إن أنا أشرف إبراهيم ودا المخبر الاقتصادي+ بعد ما الحرب العالمية التانية خلصت فرنسا اللي أخدت على دماغها جامد في الحرب من الألمان تحديداً ما كانتش قادرة تحكم سيطرتها بشكل كامل على مستعمراتها في قارة أفريقيا باريس ساعتها أدركت إنها لازم تدي مستعمراتها قدر من الاستقلالية ولو على الورق كدا وكدا يعني المهم في السياق دا صدر المرسوم رقم 0136 لسنة 45 بتوقيع من رئيس الحكومة الفرنسية المؤقتة وقتها الجنرال شارل ديغول ووزير المالية رينيه بليفن ووزير المستعمرات جاك سوستيل بموجب القرار دا تم إنشاء عملة جديدة للمستعمرات الفرنسية في أفريقيا اسمها "CFA Franc" كلمة فرنك انتوا عارفينها اسم العملة الفرنسية الـ"CFA" بقى هي اختصار للحروف الأولى من التلات كلمات دول "Colonies françaises d'Afrique" أو المستعمرات الفرنسية في أفريقيا القرار دا كان بيأثر على عدد كبير من المستعمرات الموجودة في منطقة الفرنك الفرنسي اللي تم تأسيسها سنة 1939 ومنطقة الفرنك دي كانت بتضم كل المستعمرات اللي بتتعامل بالعملات الفرنسية وكان من ضمنها دول عربية بالمناسبة زي تونس والمغرب والجزائر اللي كانوا بيتعاملوا بالفرنك لكن تونس خرجت من منطقة الفرنك سنة 1958 وغينيا خرجت سنة 1959 والمغرب خرجت بعدها سنة 1960 وبعدين الجزائر حصلتها سنة 1964 وفي سنة 1973 موريتانيا ومدغشقر خرجوا سوا كل الدول دي بقى ليها عملاتها الخاصة اللي بتصدرها بنفسها وبتتحكم فيها ودا على عكس الحاصل في الدول الأفريقية اللي فضلت تتعامل لحد النهار دا بالـ"CFA Franc" الـ"CFA Franc" أو الفرنك الأفريقي هو على الورق عملة أفريقية لكنه في الحقيقة العلاقة الوحيدة اللي بين العملة دي وبين أفريقيا هي اسمها أكثر من كدا مفيش وحشرح لك إزاي بس خليني الأول أوضح لك نقطة مهمة جداً الفرنسيين عملوا من الـ"CFA Franc" أو خلينا نقول الفرنك الأفريقي علشان نسهل على بعض عملوا منه نسختين النسختين بيتم تداولهم النهار دا من قبل 14 دولة أفريقية بيمثلوا منطقتين اقتصاديتين في أفريقيا النسخة الأولى بيتم تداولها في الاتحاد الاقتصادي والنقدي لغرب أفريقيا ودا بيضم 8 دول هي بنين وبوركينا فاسو وكوت ديفوار وغينيا بيساو ومالي والنيجر والسنغال وتوغو أما النسخة التانية من الفرنك الأفريقي فتخص الاتحاد النقدي لوسط أفريقيا ودا بيضم الكاميرون والكونغو والغابون وأفريقيا الوسطى وتشاد وغينيا الاستوائية النسختين دول اسمهم واحد وهو "CFA Franc" فيه بقى عملة كمان ارتبطت بالفرنك الفرنسي بس بقى ليها اسم مختلف وهي فرنك جزر القمر العملة الرسمية لجزر القمر النهار دا بس على الرغم من إن العملات دي هي العملات الرسمية للـ15 دولة اللي أنا ذكرتهم من شوية إلا إن الدول دي مش هي بتصدر العملات دي اللي بيصدرها وبيطبعها هي فرنسا يعني "Banknote" أو الأوراق النقدية من النسختين بتوع الفرنك الأفريقي ومعاهم فرنك جزر القمر بيتم طباعتهم في المطبعة التابعة للبنك المركزي الفرنسي في منطقة "شامالير" الموجودة في وسط فرنسا أما العملات المعدنية فبيتم سكها في دار سك العملة في باريس المهم الفرنسيين أول ما أصدروا الفرنك الأفريقي قالوا للأفارقة يا جماعة التعاون النقدي ما بينا وبينكم حتحكمه أربع مبادئ أساسية المبدأ الأول هو سعر الصرف الثابت الفرنسيين ربطوا الفرنك الأفريقي بالفرنك الفرنسي يعني ثبتوا سعر صرفه قصاده الشيء المدهش بقى هو إنهم في البداية خالص خلوا الفرنك الأفريقي بيعادل 1.
7 فرنك فرنسي يعني خلوه أغلى من عملتهم طب هما عملوا كدا ليه؟ أكيد مش عشان هما ناس طيبين باختصار رفع قيمة الفرنك الأفريقي للمستوى دا كان في مصلحة فرنسا وفي نفس الوقت كان ضد مصالح الدول الأفريقية نفسها الفرنك الأفريقي لما قيمته بقت عالية قدام الفرنك الفرنسي المنتجات الفرنسية بقت أرخص بالنسبة للأفارقة فبقوا أكثر إقبالاً عليها وبدأوا ينفضوا للإنتاج المحلي في نفس الوقت الفرنك الأفريقي لما قيمته تكون عالية الصادرات بتاعة الدول الأفريقية حتبقى غالية بالنسبة لباقي دول العالم اللي حتفضل إنها تشتري من دول تانية عملاتها أرخص وساعتها الأفارقة مش حيبقى قدامهم حل لتصريف بضاعتهم غير عن طريق فرنسا ودا حيصب طبعاً في صالح الاقتصاد الفرنسي المهم فضل الفرنك الأفريقي مربوط بالفرنك الفرنسي لحد سنة 1999 لما فرنسا دخلت منطقة اليورو من اللحظة دي بدأ ربط الفرنك الأفريقي ومعاه فرنك جزر القمر باليورو الفرنك الأفريقي النهار دا سعر صرفه الثابت قدام اليورو بيعادل 655. 95 فرنك أفريقي لكل واحد يورو أما فرنك جزر القمر فسعر صرفه متثبت عند 491.
