راجل كبير في السن كان عنده 60 سنة كان لسه طلع على المعاش ومعه تحويشة عمره اللي قيمتها بتعادل تقريباً 25 ألف دولار المهم الراجل المحترم دا قرر يستثمر القرشين اللي معه ففيه واحد من قرايبه نصحه بإنه يحط الفلوس دي في شركة معينة لكن لسوء حظه الشركة دي طلعت نصابة والراجل خسر فلوسه السؤال بقى دالوقت لكل واحد بيسمعني تفتكر إيه هو شعور الراجل دا بعد ما خسر تحويشة عمره؟ زعلان صح؟ بس تفتكر زعلان لأي درجة؟ يعني من وجهة نظرك الشخص اللي بيخسر كل أمواله أو أغلبها بيحس بإيه؟ السؤال دا فيه أستاذ في الجامعة الوطنية الأسترالية اسمه
آرون براون حاول يجاوب عليه في دراسة نشرها في 2014 تحت عنوان "تأثير الخسائر المالية القاسية" الأستاذ دا عمل مقابلات مع المستثمرين الأفراد اللي خسروا فلوسهم مع انهيار شركة الاستشارات المالية الأسترالية Storm Financial في مارس 2009 عشان يدرس تأثير الخسارة دي على صحتهم النفسية والجسدية وخلاصة الدراسة دي هي إن الآثار النفسية والجسدية اللي بيتعرض لها الناس اللي خسروا خساير مالية كبيرة بتشبه لحد كبير الآثار النفسية والجسدية اللي بيشعر بها الإنسان لما حد عزيز عليه يموت كرب شديد جداً تسبب في تدهور الصحة طبعاً درجة شعور الناس بالألم دا تختلف من شخض لآخر ومن ثقافة للتانية ولكن ما
حدش يختلف على إن ضياع شقا العمر شيء محزن وفي نفس الوقت مثير جداً للشفقة أي حد خسر فلوسه بالشكل دا تحزن عليه وخصوصاً لو كان ضحية عملية نصب ولكن مش كلنا بنعمل كدا كتير مننا شايف إن الناس اللي اتنصب عليها دي شوية أغبياء وطماعين ويستاهلوا اللي جرى لهم لأنهم ما تعلموش من حوادث النصب الشبيهة اللي بتكرر كل يوم بس هل الكلام دا دقيق؟ لأ .. وهقول لك ليه أشهر طريقة للنصب في العالم النهار دا هي طريقة مخطط بونزي واللي فكرتها باختصار عبارة عن إن شخص ما بيلم فلوس من الناس على أساس أنه هيشغلها لحسابهم في
مشروع ما وبيوعدهم بأرباح ثابتة عادة بتكون عالية وطبعاً ما بيكونش فيه مشروع ولا حاجة وبيبدأ يدي الناس دي الأرباح الموعودة من فلوسهم اللي هو اخدها منهم الناس بتفرح بالأرباح فيتشجعوا أكتر ويحطوا فلوس أكتر ويجيبوا معارفهم وهو يفضل شغال كدا يلبس طاقية دا لدا لحد ما الخدعة تنكشف والفلوس تضيع طريقة النصب دي بتم بنفس الطريقة بقى لها سنين وبتكرر بشكل يومي تقريباً في كل مكان في العالم وبرغم كدا عمرها ما بتتحرق أو بتنتهي وهتفضل تتكرر غالباً ليوم الدين مهما كانت ساذجة أو هبلة جداً ودا لأن فيها سر دالوقت إنت ممكن تتخيل نفسك أذكى من إنك تقع
في الفخ المفضوح دا أو إن الفخ دا ما بيقعش فيه غير الأغبياء بس دا طبعاً كلام مش دقيق لإنك ممكن تكون شخص ذكي جداً ومتعلم كويس جداً ويجي عيل في 3 ابتدائي ينصب عليك ويلبسك في الحيط ودا ببساطة لإنك ساذج أو تصرفت بسذاجة عشان تفهم إزاي دا ممكن يحصل لازم تعرف الناس بيتنصب عليها إزاي أصلاً ودا اللي هندردش فيه مع بعض في حلقة النهار دا أنا أشرف إبراهيم ودا المخبر الاقتصادي+ في فبراير 2009 ويليام فوكستون الرائد المتقاعد من الجيش البريطاني مسك سلاحه الشخصي وضرب نفسه طلقة في راسه ومات في بيته الموجود في مدينة ساوثهامبتون البريطانية
الراجل دا انتحر بعد أسابيع من خسارته لكل فلوسه اللي كان بيستثمرها مع النصاب الأمريكي الشهير برنارد مادوف واللي اتقبض عليه في نهاية 2008 بعد ما اتضح إنه كان بيدير Ponzi scheme عملاق قيمته 65 مليار دولار ومع الأسف ضابط الجيش البريطاني اللي قتل نفسه ما كانش هو الضحية الوحيدة لمادوف كان فيه آلاف غيره بس الشيء المثير للاهتمام في حادثة النصب دي بالذات غير أي حادثة نصب تانية هي هوية الناس اللي اتنصب عليها مادوف من خلال مخطط بونزي بسيط جداً ولكن متنفذ بحرفنة قدر ينصب على مجموعة من أذكى العقول في العالم بما في ذلك أباطرة المال في
وول ستريت اللي المفروض إنهم بحكم ذكائهم وخبراتهم وجيوش المحللين الماليين اللي شغالة لحسابهم كانوا قادرين أكتر من أي حد إنهم يشموا طريقة النصب المفضوحة دي من على بعد ميل ويكتشفوا لوحدهم إن مادوف نصاب وينقذوا نفسهم ولكن دا ما حصلش مادوف فضل مدور مخطط بونزي بتاعه من التمانينات ولحد ما قوات الـ FBI قبضت عليه في بيته في نيويورك في ديسمبر 2008 ودا يخليك تسأل هل مديري صناديق التحوط والمستثمرين الأفراد الكبار وأساتذة الجامعة والمشاهير وكل حد حط فلوسه مع مادوف عشان يستفيد من الأرباح الثابتة اللي كان بيوعد بها كانوا أغبياء؟ هل الناس دي كلها ما فيهاش واحد
الـ IQ بتاعه above average عشان يقدر يفهم إن الراجل دا سكته شمال؟ هل كلهم الطمع أعماهم؟ أفضل واحد ممكن يجاوبنا على السؤال دا هو الشخص المحترم صاحب الصورة اللي قدامكم دي دا يا جماعة Stephen Greenspan أستاذ علم النفس التربوي في جامعة كونيتيكت الأمريكية طب ليه الراجل دا هو أفضل واحد ممكن يجاوبنا على السؤال دا؟ ببساطة لإن غرينسبان غير تخصصه العلمي اللي له صلة بالموضوع فهو نفسه كان أحد ضحايا مادوف وخسر تقريباً تلت مدخراته بسببه وبالتالي هو أكتر واحد يقدر يشرح لنا إيه اللي حصل المهم بعد أيام من القبض على مادوف وتحديداً في نهاية ديسمبر 2008
غرينسبان نشر كتاب عبقري جداً اسمه حوليات السذاجة لماذا يتم خداعنا وكيف نتجنب ذلك في الكتاب دا غرينسبان شرح إزاي رغم إنه المفروض شخص ذكي ومتعلم وأستاذ في الجامعة ومعه أكتر من شهادة دكتوراه انخدع ووقع بسذاجة في الفخ الأهبل والمفضوح بتاع مخطط بونزي اللي كان بيديره مادوف ووضح إزاي إن السبب الرئيسي وراء استغراب الناس من وقوعه هو وناس أذكى منه في الفخ دا هو إنهم مش فاهمين أصلاً عملية النصب دي عادة بتحصل إزاي طب بتحصل إزاي يا بروفيسور؟ قال لك الناس اللي بتتورط في عمليات النصب اللي قايمة على مخطط بونزي بالذات بتعمل دا تحت تأثير أربع
عوامل متداخلة الـ situation أو السياق الظرفي الـ cognition أو الإدراك الـ personality أو الطبيعية الشخصية الـ emotion أو العواطف وخلونا ناخدهم بالترتيب ونبدأ بالـ situation أو السياق الظرفي بص يا سيدي لو فيه شخص اسمه مثلاً محروس جا لك النهار دا وقال لك أنا راجل أعمال عندي بيزنس قد الدنيا أنا بجيب فراخ والفراخ بتبيض وبترقد على البيض فالبيض بيفقس والكتاكيت بتكبر وتبيض والبيض بيفقس وهكذا وبعدين محروس دا قال لك أنا عاوز أتوسع في المشروع العبقري دا وأدخل في البط المسكوفي فإيه رأيك لو استثمرت معاي ما يعادل 50 ألف دولار وهديك أرباح 20% كل شهر؟ لحد هنا
إنت ممكن بنسبة كبيرة ترفض وما تصدقهوش وتشوفه نصاب لكن لما ندخل في المعادلة دي مجموعة من العوامل الظرفية والضغوط الاجتماعية ففيه احتمال كبير إنك تصدقه بغض النظر عن مدى منطقية التفاصيل الخاصة بالبيزنس بتاعه على سبيل المثال ممكن يكون فيه ناس قرايبك حاطين فلوسهم مع محروس دا وبيشكروا فيه جداً وفي ذكائه وشطارته وأمانته في نفس الوقت الراجل دا مثلاً ممكن يكون معروف عنه في المجتمع بتاعه إنه راجل كريم وفاعل خير ومحبوب والناس كلها بتتكلم عليه بشكل كويس من ناحية تالتة بتسمع إن الشخص الفلاني اللي معروف عنه إنه ذكي جداً وشاطر في التجارة حاطط فلوسه مع محروس
برضو وفوق كل دا محروس مش بيقبل فلوس من كل الناس هو بياخد فلوس من ناس محددة بس يعني مش ملهوف في السياق دا إنت ممكن تتخلى عن حذرك وتقتل أي شكوك جواك حوالين البيزنس مودل بتاع تفقيس البيض دا لإنك بقيت بتفكر ضمن سياق ظرفي بيخليك تميل للثقة في الشخص دا خارج السياق دا لو واحد صاحبك جه اقترح عليك نفس الفكرة ووعدك بنفس العوائد مش هتشك لحظة في إنه نصاب هنا بقى ممكن حد يعترض ويقول إزاي يا أشرف الكلام دا بلا سياق ظرفي بلا بطيخ هو أنا غبي عشان أقع في الفخ دا؟ والسؤال اللطيف دا ياخدنا
لتاني عامل له دور في وقوع الناس فريسة لمخططات بونزي وهو الـ cognition أو الإدراك انخداع البعض بمخطط بونزي هو في النهاية Gullibility أو سذاجة والسذاجة من الممكن اعتبارها شكل من أشكال الغباء بس دا مش معناه أبداً إن الأذكياء محصنين ضد السذاجة أو ما بيتصرفوش بسذاجة والدليل إننا لما نيجي نبص على قايمة ضحايا مادوف نلاقي ملياديرات وخبراء استثمار وأعضاء مجلس شيوخ وأطباء وأساتذة جامعات وناس معروف عنها إنها بطبيعة الحال ذكية وبرغم كدا تصرفوا بسذاجة شديدة جداً في الحادثة دي الناس دي ذكاؤها ما نفعهاش أو ما كانش كفاية هم كانوا محتاجين إنهم يكون عندهم قدر أكبر من
الإدراك مش الذكاء وفيه فرق كبير جداً بين الذكاء والإدراك عالم النفس الكندي Keith Stanovich بيقول إن الذكاء هو امتلاك الشخص للـ cognitive schemas أو المخططات المعرفية يعني إنت فيه معرفة في دماغك أما الإدراك بقى فهو التطبيق الفعلي للمعرفة اللي في دماغك دي ناس كتير ذكية جداً وممكن يكون الـ IQ بتاعها 201 وتلاقيها بتتصرف في بعض المواقف بسذاجة لإنها ببساطة لما جت تاخد قرار ما استخدمتش ذكاءها بشكل كامل أو بشكل فعال ليه الناس دي ما بستخدمتش ذكاءها بشكل كامل؟ أسباب كتير جداً أهمها الاستسهال إنت عشان تكون مطمن على فلوسك وتاخد قرار واعي إذا كنت هتستثمرها مع
محروس وللا لأ فإنت محتاج إنك تبذل مجهود ذهني محترم في معالجة وتفسير وفهم كل البيانات والأرقام والمعلومات الخاصة بالاستثمار دا عشان توصل في النهاية لقرار مبني على وعي وإدراك كتير مننا بقى بيستصعب المجهود الذهني والعقلي دا وبيميل للاستدلال والاختصارات العقلية يعني مثلاً إنت سمعت إن فلان الفلاني الخبير الاقتصادي والاستثماري المعروف حاطط فلوسه مع محروس فبدل ما تتعب نفسك وتحاول تدرس بعناية شديدة الاستثمار اللي محروس بيعرضه عليك تستسهل وتقول لنفسك يا عم دا الخبير الاقتصادي بذات نفسه حاطط فلوسه وهو بالتأكيد درس الموضوع دا وشاف إن محروس دا هو وران بافيت العرب وما فيش خطر وإلا ما
كانش حاط فلوسه معه هنا إنت ما حللتش أو ما حاولتش تدرك بنفسك إنت هنا بتستدل ودا خطأ كبير لإن وارد جداً الشخص اللي إنت بتستدل به دا يكون ما بيفهمش أصلاً أو ساذج بالمناسبة ناس كتير متخيلة إن الشخص الساذج دا هو اللي بيثق في الناس بسهولة وإنه من الأفضل إنك ما تثقش في حد وتكون دايماً شكاك بس هل الكلام دا صحيح؟ عشان نجاوب على السؤال دا لازم نتكلم على الجزء المتعلق بالـ personality أو الشخصية واللي طبيعتها بتلعب دور كبير في إمكانية وقوع الناس في فخاخ النصب في البداية لازم نعرف إن اللي بيحكم شكل العلاقات في
الحياة كلها هي الثقة يعني مثلاً علاقتك بالبنك مبنية على الثقة إنت لو مش بتثق في البنك وفي إن فلوسك في أمان عنده مش هتحطها هناك وترجع تحط راسك على المخدة لازم يكون فيه حد أدنى من الثقة من غيرها مش هنعرف نتعامل والناس زي ما إنتو عارفين شخصياتها بتختلف فيه ناس ما بتثقش في حد أبداً وناس بتثق ولكن مش بسهولة يقول لك اديني أمارة وفيه ناس تالتة بتميل لتصديق غيرها والثقة فيه بسهولة يعني الناس من الآخر في الثقة متقسمة يمين ووسط ويسار الطرفين غلط لازم تبقى في النص خصوصاً لما نيجي نتكلم على الاستثمار وهقول لك ليه
الناس اللي بتثق في غيرها بسهولة وبتصدقه بدون ما يكون فيه مبررات واضحة لدا بتعرض نفسها بشكل واضح لإنها تحط ثقتها في غير محلها ودا بيعرضها لمخاطر النصب وبالمناسبة الناس دي غالباً بتتحرج بسهولة وبتتكسف تقول لأ حتى لو لاحظت حاجات مقلقة ساعتها بتقع فريسة للانحياز التأكيدي أو confirmation bias وبتميل للتركيز على المعلومات اللي بتريحها وتدعم قرارها وتتجاهل أي معلومة بتؤدي لعكس دا طب الحل إنك ما تثقش في حد أو تثق في الناس بصعوبة شديدة جداً وتكون دايماً شديد الشك؟ برضو لأ فيه ناس كتير متخيلة إن شكها المستمر وثقتها الضعيفة في اللي حواليها هي أفضل طريقة تنقذ
بها نفسها من عمليات النصب ولكنها بالشكل دا بتؤذي نفسها وبتخلي نفسها عرضة أكبر للنصب زي ما قلت لك من شوية إنت عشان تتعامل مع الناس لازم يكون فيه ثقة لو ما فيش ثقة يبقى إنت مش هتعرف تتعامل مع أي حد تقريباً دا أي نعم ممكن يقلل من احتمالية وقوعك في فخاخ النصب بس اللي إنت مش مدركه بقى هو إن ضعف ثقتك وقلة تعاملاتك مع الغير هيقلل من احتكاكك بالناس وهيضعف اندماجك في السوق قلة احتكاكك بالناس وضعف مشاركتك في السوق هيخلوك شخص ضعيف الخبرة الاجتماعية وبالتبعية ضعيف الذكاء الاجتماعي ودي مشكلة لأن الشخص اللي عنده social intelligence
أو ذكاء اجتماعي هو أقدر من غيره على إنه يحس بالنصاب ويلقط الإشارات اللي بتوضح إذا كان الشخص اللي قدامه دا جدير بالثقة وللا لأ عشان كدا بنقول إنك لازم تقف في النص وتحاول تعرف إمتى تثق في الناس وإمتى لأ ثقتك أو عدم ثقتك في الناس ضروري تكون مبنية على أمارات معينة ومن هنا ننتقل لآخر العوامل اللي بتلعب دور في احتمالية وقوع الناس في فخ النصب وهي الـ emotion أو العاطفة تعرفوا مين هو أنجح مستثمر؟ السؤال دا مش أنا اللي بسأله اللي سأله وجاوب عليه هو طبيب الأعصاب والاقتصادي الأمريكي ويليام جاي بيرنستاين الراجل دا بيقول المستثمر
الناجح هو اللي مش بيتأثر بالمشاعر لما بيجي ياخد أي قرار استثماري وقال إن الناس العاطفيين اللي عرفهم هم في الحقيقة سيئين جداً كمستثمرين العواطف والمشاعر دايماً بتتداخل مع الاستثمار ويمكن أكتر شعورين بيحركوا الناس خصوصاً في أسواق المال هم الخوف والطمع كتير جداً من النصابين خصوصاً اللي بيستخدموا مخطط بونزي بيتعمدوا يحطوا الناس تحت ضغط ضيق الوقت ودا من خلال التأكيد على فكرة إن الفرصة الاستثمارية المقترحة هي فرصة ما تتعوضش وبالتالي إنت لازم تاخد قرار بسرعة قبل ما الفرصة تروح إنت بقى تحت تأثير الخوف و تحديداً الـ Fear of Missing Out (FOMO) أو الخوف من تفويت الفرصة
بتاخد قرار وتنط في المركب بسرعة عشان ما تندمش بعدين إنك ما أخدتش القرار دا وتزعل إن الفرصة فاتتك ولما تكون العوائد اللي النصاب بيوعد بها كبيرة هنا بقى بيدخل الطمع فيه عبارة شهيرة جداً باللغة الإنكليزية بتقول If it sounds too good to be true, it probably is يعني بالبلدي كدا لو الشيء اللي قدامك دا ممتاز جداً لدرجة إنه يبدو مش حقيقي فدا لإنه غالباً مش حقيقي كتير من النصابين بياخدوا من الناس فلوسهم وبيوعدوهم بأرباح كبيرة ما تتصدقش ولكن مع الأسف الناس تحت تأثير الطمع بتدفن شكوكها وبتغمي عقلها وهي مش شايفة قدامها غير الأرباح اللي هتاخدها
في المستقبل واللي بتقعد تحسبها في دماغها تلاقي واحد عمال يكلم نفسه ويقول أنا أديته 10 آلاف دولار وقال لي هديك 20% شهرياً يعني كل شهر هاخد ألفين وفي خلال 5 شهور هكون رجعت راس مالي طبعاً دي أحلام وأماني ووارد جداً إن المعلم دا يغطس في لمح البصر ودا ببساطة لإن مخطط بونزي مهما طال ما لهوش غير نهاية من اتنين النهاية الأولى هي إن النصاب يتكشف ويتقبض عليه والنهاية التانية هي الـ Cut and run أو انتش واجري يعني النصاب قبل ما ينكشف ويتفضح أمره ياخد الفلوس في عبه ويهرب في أي حتة هو عامل حسابه على كدا
من البداية خالص الفخ دا طمعك وخوفك كانوا أحد أسباب وقوعك فيه وهنا بقى هيفيدك جداً إنه يكون عندك شكل من أشكال الـ cold cognition أو الإدراك البارد ودا معناه إن تفكيرك وإدراكك واستدلالك يكونوا خاليين من العواطف إنت بتحكم على أي شيء بعيداً عن العاطفة ودا بالمناسبة عكسه الـ Hot cognition أو الإدراك الساخن وهو الإدراك والاستدلال المشحون بالعاطفة مع الأسف للأسباب اللي أنا ذكرتها من شوية فعمليات النصب على طريقة مخطط بونزي هتفضل مستمرة وبتكرر وهيفضل فيه ناس بتقع في فخها مهما بدا شكلها ساذج طبعاً فيه عمليات نصب عبيطة ومفضوحة وسهل اكتشافها من أول لحظة لإن البيزنس
اللي قايمة عليه غريب وغير منطقي وفيه عمليات تانية يصعب اكتشافها لإن فكرتها بتكون قايمة على بيزنس شرعي الناس بتسمع عنه كتير طريقة النصب دي موجودة في كل مكان في العالم ولكنها بتنتشر بشكل أكبر في الدول اللي ما فيهاش أوعية استثمارية كافية تستوعب فلوس الناس أو جزء كبير منها ودا بيخليهم عرضة أكبر للنصابين على العموم أنا كدا خلصت كلامي وكالعادة عندي سؤال لحضراتكم بمناسبة كلامنا عن الأوعية الاستثمارية الأسواق العربية فيها أدوات استثمار متنوعة ممكن الناس تحط فيها فلوسها عشان نشرح الأدوات دي هنحتاج نعمل حلقة ممكن توصل لـ 40 دقيقة مثلاً السؤال بقى هل ممكن تكونوا مهتمين
بحلقة طويلة زي دي؟ عرفوني من فضلكم في التعليقات في النهاية يا ريت لو عجبتك الحلقة وحابب تشوفنا تاني اشترك في القناة واستنانا في حلقات جديدة بإذن الله سلام في النهاية يا ريت لو عجبتك الحلقة يبقى لايك بقى وشير واستنانا في حلقات جديدة بإذن الله سلام
